Ymwybyddiaeth ynglŷn â Chyfeirnodi a Llên-ladrad: 2. Beth yw cyfeirnodi a chydnabod ffynonellau?

Cyfeirnodi a chydnabod yw'r dulliau a ddefnyddir i gydnabod y ffynonellau a ddefnyddiwyd gennych wrth ysgrifennu eich gwaith. Mae cyfeirnodi a chydnabod cywir hefyd yn caniatáu i'r darllenydd nabod y ffynonellau hynny'n hawdd a mynd ar eu trywydd os oes angen. Mae'n arfer academaidd da i gydnabod y cyfraniadau a wnaeth eraill i'ch gwaith.

I grynhoi felly, mae cyfeirnodi a chydnabod ffynonellau yn dangos;

• Bod eich syniadau, eich meddwl beirniadol a'ch sylwadau yn dangos ichi ymchwilio i'r maes trwy gyfeirio at arbenigwyr ac awdurdodau sefydledig
• Eich sgiliau ymchwilio a'ch bod wedi gwneud defnydd da o adnoddau'r llyfrgell
• Dilysrwydd, trwy ddefnyddio arfer academaidd da
• Eich gallu i gyfeirnodi'n gywir a manwl. Cofiwch: yn aml rhoddir marciau yn eich aseiniadau am gyfeirnodi a chydnabod yn dda.

Gall gwybodaeth ar gyfer eich aseiniad ddod o nifer helaeth o ffynonellau; gan gynnwys llyfrau, erthyglau, gwefannau, a phapurau newyddion.

Mae defnyddio amrywiaeth o ffynonellau yn dangos eich bod wedi treulio amser yn ymchwilio ar y testun.  Bydd y ffynonellau hyn hefyd yn cynorthwyo i gadarnhau eich syniadau a'ch dadleuon eich hun.

Rhaid i unrhyw beth nad yw'n wybodaeth gyffredin gael ei gydnabod.

Dylech edrych ar y rhestrau darllen a argymhellir gan eich tiwtoriaid a gwneud defnydd llawn o'r adnoddau sydd ar gael trwy gatalog y Llyfrgell. PEIDIWCH â dibynnu'n bennaf ar beiriannau chwilio ar y rhyngrwyd i ddod o hyd i ffynonellau.

Pears, R. and Shields, G. (2013). Cite them right: the essential referencing guide. London: Palgrave.